Дух легенд і традыцый

«...Дух беларускіх легенд і традыцый адчуваецца проста ў уверцюры – музыка як быццам сыходзіць з мінулага, звязваючы часы, так што прысутныя ў зале не проста апускаюцца ў дзеянне, а становяцца сапраўднымі сведкамі падзей, якія адбываюцца на сцэне…» (Ларыса Цімошык для партала «Звязда»)

13 лютага ў Вялікім гучыць цудоўная музыка Д.Смольскага. На нашай сцэне - опера "Сівая легенда", лібрэта да якой напісаў Уладзімір Караткевіч. За дырыжорскім пультам - Юрый Караваеў. У галоўных партыях: Алена Золава, Дзмітрый Шабеця, Аксана Волкава, Уладзімір Громаў, Дзмітрый Капілаў.

«У Беларусі ёсць свой Вердзі. І гэта – Дзмітрый Смольскі» – так пішуць пра знакамітага беларускага кампазітара. Сам Дзмітрый Браніслававіч у свой час успамінаў: «Знайшоў «Сівую легенду» – адразу зразумеў, што гэта сапраўдная оперная, рамантычная тэма...»

«Нельга нобілю ўзяць у жонкі халопку!» – адказвае Аляхно Кізгайла свайму сябру – шляхцічу Раману Ракутовічу ў аповесці В.Караткевіча, калі Раман закахаўся ў служанку Кізгайлы – Ірыну. Магчыма, гэтая гісторыя завяршылася б па-іншаму, калі б жонка Кізгайлы – Любка не загарэлася пачуццямі да Рамана… Як сапраўднае мужчынскае сяброўства можа перарасці ў нянавісць, а любоўная драма – у крывавае супрацьстаянне, у якое апынуліся ўцягнутыя сотні людзей?.. Даведаемся 13 лютага.