Новости

«Беларускія прэм’еры» Дзмітрыя Шабеці

 

Ён служыць у Вялікім тэатры Беларусі трэці сезон. І за гэты час яго творчая скарбонка ўжо папоўнілася такімі вядучымі тэнаровымі партыямі, як: Самсон («Самсон і Даліла» К.Сен-Санса), Хазэ («Кармэн» Ж.Бізэ), Вадэмон («Іаланта» П.Чайкоўскага), Дубатоўк («Дзікае паляванне караля Стаха» Ул.Солтана), Раберта («Вілісы.Фатум» Дж.Пучыні), Каварадосі («Тоска» Дж. Пучыні), Генрых («Лятучая мыш» І.Штраўса), Доктар Фаўст («Фаўст» Ш.Гуно).

 

 

Музыкальны крытык Надзея Бунцэвіч так адгукнулася на працу Шабеці ў ролі Самсона: «Самсон Дзмітрыя Шабеці атрымаўся пераважна лірычным персанажам. Але ў трэцяй дзеі здарылася сапраўднае цуда. У голасе гэтага найталенавіцейшага артыста раптам узніклі не ўласцівыя акадэмічнаму вакалу, але такія родныя для старадаўніх іўдзейскіх песняспеваў фаршлагі...»

 

У лютым Дзмітрый Шабеця стаў фіналістам Міжнароднага конкурсу вакалістаў – выканаўцаў італьянскай оперы Competizione dell’Opera-2022, які праходзіў 25-ы раз у Вялікім тэатры Расіі. З 600 прэтэндэнтаў у першы паўфінал прайшлі 120 чалавек, у другі – 52, у фінал – 12. Якраз у гэты тузін трапіў наш Дзмітрый Шабеця.

 

А ў пачатку снежня 2021 года беларускі тэнар стаў лаўрэатам 3-й прэміі Х Міжнароднага конкурсу оперных спевакоў «Санкт-Пецярбург». Да гэтага, у 2015-м, ён узяў Першую прэмію Міжнароднага конкурсу-фестывалю «Мастацтва XXI стагоддзя» (Украіна, Кіеў).

 

Экскурсии и фотосессии

Дзмітрый скончыў Гомельскі дзяржаўны каледж мастацтваў імя Н. Ф. Сакалоўскага па спецыяльнасці «акадэмічныя спевы» (2011), затым – Беларускую дзяржаўную акадэмію музыкі (клас народнага артыста Расіі Э. І. Пелагейчанкі), у 2018 годзе – магістратуру акадэміі.

 

У опернай студыі Беларускай дзяржаўнай акадэміі музыкі выканаў партыі Рудольфа («Багема» Дж. Пучыні), Феранда («Так робяць усё» В.А. Моцарта), Лыкава («Царская нявеста» Н. Рымскага-Корсакава), Хазэ («Кармэн» Ж. Бізэ).

 

Дзмітрый Шабеця – запрошаны саліст Беларускага дзяржаўнага акадэмічнага музыкальнага тэатра і заслужанага калектыву Рэспублікі Беларусь музыкальнай капэлы «Санорус».

 

1 сакавіка 2022 года саліст беларускай оперы Дзмітрый Шабеця атрымаў грант Прэзідэнта Рэспублікі Беларусь – на рэалізацыю аўтарскага праекта «Беларускія прэм'еры», які накіраваны на далейшае развіццё і папулярызацыю беларускай культуры.

 

Аўтарскі праект саліста оперы ўжо сабраў гледачоў Музея Адама Міцкевіча ў Навагрудку напрыканцы лютага, а таксама 5 сакавіка ў Лідзе. 29 сакавіка прыгожае беларускае слова і музыка гучалі ў Маскве – Дзмітрый Шабеця разам з калегамі і сябрамі па тэатру выступаў у амбасадзе Рэспублікі Беларусь у РФ.

 

Далей канцэрты, у якіх гучаць творы сучасных беларускіх кампазітараў на словы беларускіх класікаў і сучасных паэтаў, пройдуць у Мінску – Музыкальным коледжы імя М.І. Глінкі (31 траўня), потым – у Маладзечна, на штогадовым фестывалі беларускай песні і паэзіі (10 чэрвеня), а таксама у Нясвіжы, у рамках Вечароў Вялікага тэатра у палацы Радзівілаў (17 чэрвеня).

 

На сцэне Вялікага тэатра Беларусі пачуем тэнар Дзмітрыя Шабеці 5 ліпеня ў Камернай зале. 

 

 

 

 

 

 

 

 

 

0
0
0
s2sdefault

ПАРТНЕРЫ