ПАДАРУНКАВЫ СЕРТЫФІКАТ: ГЭТА ПРОСТА СВЯТА НЕЙКАЕ!

 

Дарагія сябры! Ламаеце галаву, не ведаючы, што паднесці сваім блізкім і родным людзям у якасці падарунка на свята? Купляйце падарункавы сертыфікат Вялікага тэатра Беларусі!
І вы яшчэ пытаецеся: навошта?! Для гэтага ёсць некалькі важкіх прычын. Па-першае, гэта прыгожы падарунак: сертыфікат прадаецца ў элегантным канверце з эксклюзіўнай паперы з залатым цісненнем, сам жа дакумент выкананы ў спрадвечных колерах беларускага Вялікага тэатра − залатым і чырвоным. Па-другое, гэта ўнікальная магчымасць зрабіць ідэальны падарунак − паднесці блізкаму чалавеку тое, што ён сам жадае. Уладальнік сертыфіката ўжо сам вызначыцца: ці хоча ён трапіць на прэм'еру балета, ці ўбачыць любімую оперу, ці паслухаць ва ўтульнай Камернай зале канцэрт вакальнай або інструментальнай музыкі. Па-трэцяе, сума падарункавага сертыфіката – 50 рублёў або 100 рублёў – дазволіць набыць не адзін білет – як мінімум двое змогуць уладкавацца на добрых месцах у партэры, і нішто іх не адцягне ад сустрэчы з мастацтвам.
Па-чацвёртае, сертыфікат − выдатны падарунак не толькі для родных ці сяброў. Калегі і ваш шэф, можна нават не сумнявацца, будуць рады такому прэзенту. Па-пятае, падарункавы сертыфікат эканоміць ваш час! Вам не трэба бегаць па крамах у пошуках нейкіх універсальных падарункаў. Паверце: фарфоравыя фігуркі падабаюцца не кожнаму, а мыла (хоць бы і з французскім водарам) і шкарпэткі ўжо няма куды складаваць! Іншая справа − сертыфікат! Бо вы ўручаеце не проста чарговы падарунак, вы дорыце свята! А гэта самае цудоўнае, што можа быць у жыцці!
Такім чынам, што гэта такое ПАДАРУНКАВЫ СЕРТЫФІКАТ і як ім карыстацца?
1. Падарункавы сертыфікат забяспечвае яго ўладальніку права на атрыманне білетаў на любыя спектаклі Вялікага тэатра Беларусі (якія ёсць у наяўнасці ў касе тэатра на дадзены момант). Сертыфікат − дакумент на прад'яўніка. У кожнага сертыфіката – свой унікальны нумар, які і пацвярджае сапраўднасць дакумента.
2. Падарункавы сертыфікат можна набыць толькі ў касе Вялікага тэатра Беларусі (пл. Парыжскай Камуны, 1, бліжэйшая ст.м. – «Няміга»; час працы: штодня з 10:00 да 20:00).
3. Купіць падарункавы сертыфікат можна як за наяўны, так і безнаяўны разлік.
4. Абмяняць падарункавы сертыфікат на квіткі на канкрэтны спектакль (або спектаклі) можна зноў жа толькі ў касе Вялікага тэатра Беларусі.
5. Тэрмін дзеяння падарункавага сертыфіката – 12 (дванаццаць) месяцаў з дня яго набыцця. (Дата і час пакупкі паказваюцца на дакуменце.) Калі за гэты час квіткі не былі набытыя, намінальны кошт сертыфіката не вяртаецца яго ўладальніку!
6. Выкарыстоўваць падарункавы сертыфікат можна толькі адзін раз (пасля абмену на квіткі ён анулюецца, вы яго пакідаеце ў касе тэатра).
7. Калі ў вас на руках некалькі падарункавых сертыфікатаў, натуральна, вы можаце набыць квіткі на ўсю суму гэтых дакументаў. Але калі ж сума сертыфіката не пакрывае кошт квітка (квіткоў), вы яе даплачваеце. Калі намінал падарункавага сертыфіката не выкарыстоўваўся вамі цалкам падчас куплі квіткоў, вяртанне грашовых сродкаў не адбываецца.
8. Падарункавы сертыфікат не прымаецца да выканання, калі ён сапсаваны або мае значныя механічныя пашкоджанні. Калі вы страцілі падарункавы сертыфікат, на жаль, аднавіць яго ці заплаціць грашовыя сродкі па намінале сертыфіката не ўяўляецца магчымым.

Няўжо вы яшчэ думаеце? Паверце: сустрэча з чароўным, чаканне цуду і адчуванне свята – лепшы падарунак.
І ўсё гэта ляжыць у адным канверце!