Вялікі тэатр Беларусi
Вялікі тэатр Беларусi
Вялікі тэатр Беларусi
Вялікі тэатр Беларусi
“Грандыёзны спектакль вялізнага нацыянальнага значэння”, “твор, напісаны ў лепшых традыцыях опернага жанру”, – так гавораць і крытыкі, і публіка пра оперу “Сівая легенда”. Гэты спектакль называюць операй пра любоў да беларускай зямлі і яе народа, гавораць аб арыгінальнасці кампазіцыі, паэтычнасці мовы і эмацыйнасці гучання. Час паказаў, што “Сівая легенда” стала шэдэўрам нацыянальнай музыкі. Опера была створана больш за 45 гадоў таму. Сваю працу і талент у яе стварэнне паўкладалі класікі беларускага мастацтва – кампазітар Дзмітрый Смольскі і аўтар лібрэта Уладзімір Караткевіч.
У гэтым спектаклі спалучыліся веліч задумы і маштабнасць яе ўвасаблення. Патрыятычнае гучанне літаратурнай першакрыніцы, глыбіня і актуальнасць думак і ідэй, закладзеных у тэксце, знайшлі свой выраз у музыцы оперы. Агранёная глыбокім і тонкім рэжысёрскім бачаннем, прыгажосцю і дакладнасцю сцэнаграфічнага рашэння, “Сівая легенда” аб вялікай усёпераможнай сіле кахання, здольнай пераадолець раскол, варожасць і самыя страшныя войны, стала цудоўным упрыгожаннем нацыянальнага рэпертуару тэатра.
22 красавіка галоўныя партыі ў нацыянальнай оперы “Сівая легенда” выканаюць зоркі Вялікага тэатра Беларусі. У партыі Ірыны – лаўрэат міжнародных конкурсаў Алена Золава. У ролі Любкі – заслужаная артыстка Рэспублікі Беларусь Аксана Якушэвіч. У галоўных мужчынскіх партыях выступяць народны артыст краіны Станіслаў Трыфанаў (Кізгайла) і ўладальнік медаля Францыска Скарыны Дзмітрый Шабеця (Раман). У ролі Найміта выйдзе заслужаны артыст рэспублікі Алег Мельнікаў. За дырыжорскім пультам – дыпламант міжнароднага конкурсу Юрый Караваеў.
