Нясвіж-2026

13 мерапрыемстваў за 3 дні! Білеты на фестываль «Вечары Вялікага тэатра Беларусі ў замку Радзівілаў» у продажы! З 19 па 21 чэрвеня ўсе творчыя калектывы тэатра едуць у Нясвіж, каб падарыць гледачам сапраўднае свята. Гэта будзе 16-ы па ліку творчы праект.

Адкрые фестываль 19 чэрвеня ў 16:00 у Тэатральнай зале замка Радзівілаў канцэрт галоўнага рэжысёра тэатра Ганны Маторнай «Беларуская опера: традыцыя і сучаснасць». Тэатралізаваная праграма падрыхтавана ў рамках творчага праекта «На скрыжаванні музычных падзей: опера – гэта модна, опера – гэта моцна!», які рэалізуецца за кошт сродкаў гранта Прэзідэнта Рэспублікі Беларусь у сферы культуры на 2026 год.
«Праект накіраваны на папулярызацыю беларускай опернай музыкі, выкананне новых твораў беларускіх кампазітараў, прыцягненне ў акадэмічны фармат стылю красовер і творчых эксперыментаў... Але галоўны пасыл гэтага праекта нават не столькі ў адкрыцці самой новай музыкі, колькі ў асветніцкай сутнасці музычна-тэатральнай культуры, – кажа Ганна Дзмітрыеўна. − Каханне і запал, праўда і хлусня, боль адзіноты і далікатны свет чалавечага шчасця, іронія, феерверк нястрымных эмоцый – усё гэта свет Оперы!»
Да 100-годдзя з дня нараджэння Аляксандра Зацэпіна ў Тэатральнай зале замка ў 19:00 будзе прадстаўлена праграма рэжысёра Наталлі Бараноўскай «Есть только миг между прошлым и будущим». У выкананні калектыву «А. M. A. D. I. S. Brass» (мастацкі кіраўнік – Дзмітрый Гарбачук) і вядучых салістаў оперы прагучаць «хіты», знаёмыя, мабыць, усім: «Песенка о медведях», «Если б я был султан…», «Любовь одна виновата…», «Песня про зайцев», «Помоги мне…», «Остров невезения» і многія іншыя.

У 21: 00 − на вялікай сцэне ў Цэнтральным двары Нясвіжскага замка ўпершыню будзе паказаны містычны спектакль «Вілісы. Фатум» − аб трагічным каханні, здрадзе і помсце, якая хаваецца ў апантаным танцы Віліс...
Белыя вуалі прывідных Віліс − дзяўчат-зданяў, падманутых жаніхамі, зачаравальная музыка Джакама Пучыні, гіпнатычныя святло і танец, выстаяць перад якім немагчыма – усё гэта опера-балет «Вілісы. Фатум», адзін з самых атмасферных спектакляў Вялікага тэатра. Гэта цудоўная рэжысёрская праца заслужанай артысткі Рэспублікі Беларусь Аксаны Волкавай.
У суботу, 20 чэрвеня, другі фестывальны дзень адкрые ў 11 гадзін раніцы ў Тэатральнай зале Духавы квінтэт тэатра – музыканты раскажуць «Гісторыю Бабара, маленькага сланяня» Ф.Пуленка.
Аднойчы мастак Жан дэ Бруноф пачуў, як яго жонка, Сесіль, распавядае сынам на ноч на хаду складзеную казку пра маленькае сланяня, – і замаляваў яе. Так нарадзілася дзіўная гісторыя пра прыгоды Бабара. Пазней, у 1940-ым годзе французскі кампазітар Франсіс Пуленк напісаў музыку да казкі − і гісторыя Бабара загучала пад фартэпіяна. 20 чэрвеня вялікіх і маленькіх гледачоў чакае займальнае музычнае падарожжа, падчас якога сланяняці Бабару прыйдзецца пасталець…
У 13: 00 у Тэатральнай зале «разальецца» «Боскае святло любові беларускай» – дзівоснай прыгажосці праграму прадставяць рэжысёр Марыя Ісаева, вядучыя салісты оперы Марта Данусевіч і Тарас Прысяжнюк, артысткі хору тэатра, калектыў «А.M. A. D. I. S. Brass» (мастацкі кіраўнік – Дзмітрый Гарбачук) і Ірына Буцель (фартэпіяна). У канцэрце прагучаць песні «Красуй, Беларусь!» В. Раінчыка, «Явар і каліна» Ю. Семянякі, «Азёры дабрыні» Л. Захлеўнага, «Багародзіца, Дзева» А. Хадоска, «Зачараваная далечыня» А. Пахмутавай і інш.
У праграме «Вечароў Вялікага тэатра ў замку Радзівілаў» заўсёды асаблівае месца займае канцэрт, які музыканты рыхтуюць для надзвычайна цудоўнай пляцоўкі Нясвіжа – Касцёла Божага Цела.
20 чэрвеня ў 15:00 у адным з найстарэйшых і найпрыгажэйшых касцёлаў Еўропы традыцыйна прагучыць музычная праграма.
У 16: 30 зноў пераносімся ў Тэатральную залу замка: на сцэне – паказ прэм'ернай оперы Г.Ф.Гендэля «Ацыс і Галатэя» рэжысёра Наталлі Бараноўскай.
Цыклоп Паліфем, неўзаемна закаханы ў марскую німфу Галатэю, у парыве рэўнаснага адчаю забівае яе каханага – юнага Ацыса. Але каханне Галатэі − мацней за смерць...
У галоўных партыях − вядучыя салісты оперы, салісты балета, артысты хору і Дзіцячага музычнага тэатра-студыі Вялікага тэатра Беларусі. Опера Гендэля прагучыць у выкананні камернага складу аркестра. За дырыжорскім пультам − Віталь Грышчанка.
У 19: 30 на сцэне Тэатральнай залы замка – «Цудоўная чацвёрка». Менавіта так называецца канцэрт, які падрыхтавала заслужаная артыстка Рэспублікі Беларусь Аксана Волкава.
Завяршае суботні фестывальны дзень казка пра хлопчыка з залатымі валасамі – пра Маленькага прынца, створаная Антуанам дэ Сент-Экзюперы. У 21: 00 на нашай сцэне Цэнтральнага двара Нясвіжскага замка – балет у пастаноўцы Аляксандры Ціхаміравай на музыку Я.Глебава.

Асаблівы настрой трэцяму фестывальнаму дню ў Нясвіжы – 21 чэрвеня – падораць яркія музыканты аркестра Вялікага тэатра Беларусі – у 11:00 гледачоў чакае канцэрт флейт «Нядзельная раніца ў добрай кампаніі» рэжысёра Ганны Маторнай.
«Брава, Моцарт!» − будзем захапляцца творамі генія ў Тэатральнай зале замка ў 13: 30. Рэжысёр Наталля Кузьмянкова, салісты оперы Анастасія Храпіцкая, Андрэй Сялюцін, Руслан Маспанаў, Ірына Паляшчук, Іосіф Нікіценка, Марыя Булда, Кірыл Панфілаў, Дар'я Гаражанка, Андрэй Мацюшонак, Вольга Маліноўская і Анастасія Дубоўская (фартэпіяна) падрыхтавалі праграму да 270-гадовага юбілею В.А. Моцарта.
У 15: 30 у Тэатральнай зале замка – праграма «Серэнада +», якую рыхтуе струнны квінтэт «Серэнада», мастацкім кіраўніком якога з'яўляецца заслужаная артыстка Рэспублікі Беларусь Таццяна Траццяк.
«Гэта сапраўды ўнікальная праграма нашага квінтэта, у якой у суправаджэнні «Серэнады» выступяць артысты аркестра Вялікага тэатра Беларусі – лаўрэаты міжнародных конкурсаў Наталля Мурзіна (флейта), Вераніка Грабоўская (арфа), Дзяніс Парэчын (саксафон-альт), Аляксандр Цірыбінін (ударныя). А ў якасці салістаў выступяць... удзельнікі квінтэта», − кажа Таццяна Траццяк. Сама Таццяна будзе саліраваць... як піяністка. Ёй жа належаць і новыя перакладанні для квінтэта.
Завершыць 16-ы фестываль у Нясвіжы (18: 00) Гала-канцэрт зорак Вялікага тэатра, які заўсёды становіцца яркай падзеяй, бо ў ім прымаюць удзел вядучыя салісты оперы і балета, артысты хору, аркестра, міманса. Гэта будзе цудоўнае завяршэнне свята.