Навiны

Абліччы прыгажосці

"Усё жыццё я аддала вялікай оперы, а вось камерную музыку пачала спяваць адносна нядаўна", - прызнаецца Тамара Глаголева, чый канцэрт мы пачуем у малой зале 24 мая.

Калі Тамара Глаголева толькі прымярала на сябе новую ролю, на гэты раз - загадчыцы Камернай залай імя Л.П. Александроўскай, яна марыла, каб на малой сцэне гучала б, як правіла, светлая музыка. Магчыма, гэта звязана з тым, што ў рэпертуары заслужанай артысткі Рэспублікі Беларусь былі выключна драматычныя партыі: Абігаіль у "Набука", Віялета ў "Травіяце", Лэдзі Макбет у "Макбеце", Аіда ў аднайменнай оперы Джузэпэ Вердзі, Марфа ў "Царскай нявесце" Мікалая Рымскага-Корсакава, Чыо-чыо-сан у "Мадам Батэрфляй "Джакама Пучыні і многія іншыя. "А гэта бясконцыя пакуты і слёзы, - усміхаецца Тамара Міхайлаўна. - Маім жаданнем было стварыць у камернай зале на 120 чалавек ўтульны куток, дзе гледачы часцей смяяліся б, чым плакалі. Хацелася, каб маладыя рэжысёры ставілі тут оперы вясёлага, жыццярадаснага характару, на якіх публіка б адпачывала. Безумоўна, слухаць класічную музыку - гэта ўсё ж такі праца, і перш за ўсё - душы. Але было б прыемна, каб людзі, прыходзячы ў малую залу, напаўняліся ў большай ступені пазітыўнымі эмоцыямі".

24 мая Тамара Глаголева запрашае гледачоў на свой канцэрт, які яна назвала "Абліччы прыгажосці".

- Спачатку я думала прысвяціць вечар барочнай музыцы, але потым вырашыла: не, для такіх твораў патрэбен падрыхтаваны слухач, а я хацела, каб канцэрт знайшоў водгук у сэрцы самага рознага гледача. Таму апяваць на вечары буду... прыгажосць. Прыгажосць мастацтва, - распавяла Тамара Міхайлаўна. - Што ёсць прыгажосць? Для мяне яна непарыўна звязана з дабрынёй, адно немагчыма без іншага. А прыгажосць мастацтва, без сумненняў, змяняе жыццё да лепшага.

Напрыклад, песня "Фіялкі" Алясандра Скарлаці раскажа пра прыгажосць прыроды - праз зборны вобраз кветкі. "Канцона" Ферэнца Ліста яшчэ раз нагадае, як неацэнна праўдзівае сяброўства, як бы падкрэсліваючы слова Франсуа дэ Ларошфуко: "Як ні рэдка сустракаецца сапраўдная любоў, сапраўднае сяброўства сустракаецца яшчэ радзей". ("Канцону" я буду выконваць не на мове арыгіналу, а ў перакладзе на беларускую мову: вельмі хочацца, каб музыка слова узбагачала музыку гуку. Гледачы павінны зразумець ўвесь сэнс, закладзены аўтарамі ў твор). Неверагодная прыгажосць музыкі - у кожным гуку мелодыі (для флейты) Крыстафа Глюка з оперы "Арфей і Эўрыдзіка" і мелодыі (для віяланчэлі) Антона Рубінштэйна (у перакладанні для голасу). Уся прыгажосць трагедыі прагучыць у арыі Маргарыты з оперы "Мефістофель" Арыга Бойта. Арыя Джаконды з аднайменнай оперы Амилькарэ Панк’елі пакажа прыгажосць жанчыны нават у гадзіны адчаю, у момант перажывання глыбокай асабістай трагедыі. Зусім іншая - светлая, радасная, жартаўлівая арыя Сюзаны з "Вяселля Фігара" Моцарта адкрые прыгажосць чалавечых інтрыгуючых узаемаадносін. Зноў жа праз прыгажосць прыроды... Рамкі кароткага інтэрв'ю не даюць месца падрабязнасцям. Але гэта, праўда, у сціснутым выглядзе, і ёсць - абліччы прыгажосці... Зрэшты, усё недасказанае вы пачуеце на канцэрце 24 мая.

Застаецца дадаць, што за раялем - лаўрэат міжнароднага конкурсу Таццяна Іванова. А у канцэрце таксама возьмуць удзел беларускі тэнар Аляксей Мікуцель і цудоўныя артысты аркестра, якія заўсёды становяцца упрыгожаннем любога камернага канцэрта.