Усе на баль!

Дарагія сябры!

Ноч на Стары Новы год – з 13 на 14 студзеня – дакладна стане чароўнай, калі правесці гэты час у Вялікім тэатры Беларусі. Мы зноў запрашаем вас на Вялікі Навагодні баль, які пройдзе ўжо ў 9-ы раз!

Віхор танцаў і вір самых розных забаў, жывая музыка і цікавыя фотазоны, бліскучыя жарты і выдатны настрой, розыгрышы і вясёлая кампанія, незвычайныя сюрпрызы, шампанскае, гала-канцэрт і міні-праграмы – усё гэта чакае вас у тэатры. Дадайце да гэтага магчымасць не толькі ўбачыць любімых артыстаў, але нават паразмаўляць з імі і, вядома, узяць аўтограф – і вы зразумееце, што лепшага месца ў Мінску, каб сустрэць Стары Новы год, вы і не знойдзеце!

Ну і вядома, вы памятаеце, што ўсе, хто набыў білет на Навагодні баль, можа смела прыходзіць на ўрокі танцаў, якія традыцыйна праходзяць у тэатры. Дарэчы, пачнуцца яны ўжо ў канцы кастрычніка. Так што спяшайцеся купіць запаветны квіток! Менавіта ён дасць вам магчымасць дзіўным чынам перамясціцца з вар'яцкага XXI века ў мiнулыя стагоддзi. Але і вы прыкладзіце для гэтага трохі высілкаў. Як будзе выдатна, калі дамы прыйдуць у пышных бальных або вячэрніх сукенках у падлогу, а мужчыны – у смокінгах або элегантных касцюмах.

Мы чакаем вас у Вялікім тэатры!