Вялікі тэатр Беларусi
Вялікі тэатр Беларусi
Вялікі тэатр Беларусi
Вялікі тэатр Беларусi
Заслужаны артыст Азербайджана, саліст Бакінскай філармоніі Ільхам Назараў адразу заваяваў суддзяў папулярнага тэлевізійнага конкурсу «Вялікая опера» сваімі незвычайнымі вакальнымі дадзенымі. Ільхам Назараў – уладальнік прыгожага высокага мужчынскага голасу – контратэнар. І пачуць яго ёсць магчымасць у беларускага гледача. 20 снежня – у Гала-канцэрце фіналістаў IV Мінскага міжнароднага Каляднага конкурсу вакалістаў, а 22 снежня – у Гала-канцэрце зорак сусветнай оперы.
Цікава, што ў свой час Ільхам паехаў у Італію навучацца вакальнай грамаце як... барытон. Але па сканчэнні аднаго года ён адкрыў у сабе іншы голас – контратэнар. І працягнуў стажыравацца ў Вінчэнца дэ Вива ў Academia d'Arte Lirica. Як раз у гэтыя гады ён удзельнічаў у шматлікіх міжнародных фестывалях: Ravenna Festival, Della Valle d'Itria, Pergolesi Festival. У Італіі ён спяваў найскладанейшыя партыі Арфея, Артаксэркса, Аберона, па прыездзе ў Баку выконваў ролі Керубіна, Прылепы і інш. У 2016-м Назараў атрымаў Першую прэмію Міжнароднага конкурсу вакалістаў Мусліма Магамаева ў Маскве. На сёння Ільхам – адзіны контратэнар ў Азербайджане і адзіны ў краіне ўладальнік адразу двух розных галасоў – контратэнар і барытон. (Як барытон спяваў на сцэне Бакінскага тэатра оперы і балета партыі Алека ў аднайменнай оперы С. Рахманінава або Сільвіа ў «Паяцы» Р. Леанкавала.) Менавіта Ільхам Назараў стаў першым азербайджанскім выканаўцам, які выступіў у Рымскім оперным тэатры (опера «Нос» Д. Шастаковіча, пастаноўшчык Петэр Штайн).
