Вялікі тэатр Беларусi
Вялікі тэатр Беларусi
Вялікі тэатр Беларусi
Вялікі тэатр Беларусi
- Партыя Лізы здаецца не вельмай вялікі па аб'ёме, з партыяй Германа яе, вядома, ніяк нельга параўнаць, але на працягу ўсяго спектакля яна нібы пражывае некалькі, зусім адрозных адзін ад аднаго, эмацыйных станаў! І ўсё гэта трэба перадаць граматна, а галоўнае - шчыра, - прызнаецца салістка оперы Таццяна Пятрова, уладальніца медаля Францыска Скарыны. - Магчыма, у вакальным плане асаблівых складанасцяў тут няма, але музыка Чайкоўскага сама па сабе не такая простая і лёгкая. Хоць партыя Лізы, як у свой час Іяланты або Таццяны з «Яўгенія Анегіна», як кажуць, «легла на мой голас». Зараз шукаю новыя фарбы як у голасе, так і ў стварэнні вобраза. Так, нашы «Лізы» усё прыгожыя, але кожная выканаўца прыўносіць у сваю гераіню нешта сваё, хацелася б і мне быць асаблівай. Над гэтым і працую... Усё ж такі мая гераіня, Ліза, - гэта цэлы Свет. У самай першай арыі трэба раскрыць яе свет, свет дзяўчынкі, якая разгубленая і напалохана, але страшыць яе не Герман, а яе пачуццё, якое нарадзілася ў ёй. Тая, якая павінна выйсці замуж за годнага чалавека, закахалася ў незнаёмца. Здаецца, арыя доўжыцца крыху больш за тры хвіліны, але за гэты час трэба пастарацца раскрыць увесь гэты вялізны свет душы!.. А вазьміце апошнюю арыю Лізы: толькі на імгненне ёсць нейкае святло ў яе словах, калі яна бачыць Германа, а потым - ўсведамленне ўсёй трагедыі, боль, туга, смутак. І вось гэтыя дзве абсалютна розныя плоскасці - у адным спектаклі, у адным вобразе...
Оперу «Пікавая дама» Пётр Ільіч Чайкоўскі напісаў 130 гадоў таму. 29 лютага на сцэне беларускага Вялікага партыю Лізы ў самым містычным творы кампазітара ўпершыню праспявае Таццяна Пятрова. Але гледачоў чакаюць і іншыя адкрыцці. У апошні дзень зімы на нашай сцэне адбудуцца яшчэ два дэбюту салістаў оперы: Кацярына Міхнавец выканае партыю Паліны, Дзяніс Янцэвіч - князя Елецкага.
Дадамо, што 29 лютага ў оперы П. Чайкоўскага «Пікавая дама» (пастаноўка П. Карталава, Балгарыя) гледачы пачуюць: народнага артыста Беларусі Сяргея Франкоўскага (Герман), заслужаных артыстаў рэспублікі Алену Сало (Графіня) і Станіслава Трыфанава (Граф Томскі), лаўрэатаў міжнародных конкурсаў Наталлю Акініну (Гувернантка), Ганну Гур'еву (Прылепа), Аляксандра Гелаха (Чэкалінскі), Віктара Мендзелева (Чапліцкі), Дзмітрыя Капілава (Сурын) і інш. Дырыжор - уладальнік медаля Францыска Скарыны Андрэй Галанаў.
