Вялікі тэатр Беларусi
Вялікі тэатр Беларусi
Вялікі тэатр Беларусi
Вялікі тэатр Беларусi
Беларускі Вялікі пачаў новы, 88-ы сезон. Вельмі спадзяемся, што гэтыя «васьмёркі» апынуцца шчаслівымі як для самога тэатра, так і для гледачоў, для якіх дзверы ў храм мастацтва расчыніліся 8 верасня. Вялікі не змяняе сабе: мы адкрылі сезон прэм'ерай.
8 верасня на сцэне Вялікага ажыў свет, створаны 145 гадоў таму двума нарвежскімі геніямі - драматургам Генрыкам Ібсэнам і кампазітарам Эдвардам Грыгам; свет, напоўнены дзіўнымі вобразамі скандынаўскай міфалогіі. У тэатральную афішу праз 42 гады вярнуўся балет «Пер Гюнт». Але гэта зусім іншая гісторыя, кажа харэограф-пастаноўшчык Сяргей Мікель: «Мне хацелася актуалізаваць матэрыял, максімальна наблізіцца да жыцця, зразумелага сучаснаму гледачу. Сюжэт мне здаецца вельмі надзённым. У эпоху бязмежных магчымасцяў, калі практычна не існуе межаў для сваёй рэалізацыі, усё часцей і часцей чалавек шукае сябе, прычым шукае сябе сапраўднага... »
Маэстра Аляксандр Анісімаў (народны артыст Беларусі - дырыжор-пастаноўшчык спектакля), як і абяцаў, здзівіў гледачоў: публіка пачула як вядомыя мелодыі, напрыклад, «У пячоры Горнага караля», так і новую музыку - яркую, узрушаючай прыгажосці. Акрамя таго, у канву балетнага спектакля гарманічна былі ўплецены ролі салістаў оперы - свае вакальныя партыі яны выканалі на нарвежскім.
Пераплесці мінулае і сучаснасць, рэальнасць і выдумку, захаваць традыцыі і наблізіцца да цяперашняга часу - такая няпростая задача стаяла і перад мастаком-пастаноўшчыкам Любоўю Сідзельнікавай. І яна з ёй справілася проста бліскуча: на сцэне ажылі светы: рамантычны - Озе, лічбавы - Горнага караля, містычны - Гузічніка і яго світы, рэальны - нарвежскага гарадка. Ну і цэлы Сусвет - гэта свет Сольвейг і яе бясконцай любові да Пера Гюнта, якую яна пранесла праз усё жыццё...
У прэм'ерным спектаклі галоўныя партыі выканалі вядучыя артысты балета: Пер Гюнт (юны) - Эвен Капітэн, Сольвейг (юная) - Людміла Уланцева, Пер Гюнт (сівавалосы) - Антон Краўчанка, Сольвейг (сівавалосая) - Ганна Фокіна, Озе - Ірына Яромкіна, Перасяленцы - Канстанцін Кузняцоў, Ганна Фокіна, Карына Малахоўская, Гузічнік - Такатошы Мачыяма, Крывыя - Таццяна Уласень, Вераніка Аўчыннікава, Вераніка Олещенко, Горны кароль - Ігар Артамонаў, Доўрская панна (Дачка Горнага караля) - Аляксандра Чыжык, Анітра - Яна Штангей, Інгрыд - Дар'я Медоўская, Мас Мон - Мікіта Шуба; а таксама салісты оперы: Алена Золава (вакальная партыя Сольвейг), Іна Русіноўская, Алена Бундзелева, Алена Сіняўская, Вольга Маліноўская, Аляксандр Гелах, Аляксандр Жукаў, Дзмітрый Трафімук, Дзмітрый Шабеця, Андрэй Кліпо і інш. За дырыжорскім пультам - маэстра Аляксандр Анісімаў.
«Сяргей Мікель адкрыў мне дзверы ў новую цікавую харэаграфію...» - прызнаўся пасля прэм'еры вядучы артыст балета Такатошы Мачыяма. 8 верасня малады балетмайстар адкрыў нам усім дзверы ў новы сезон. З 88-м тэатральным годам, сябры!
Партнёр:
