Герман з Масквы, Томскі – з Пецярбурга

Да нас зноў едуць госці! 15 лютага ў оперы П.Чайкоўскага "Пікавая дама" на сцэну Вялікага тэатра Беларусі выйдуць Міхаіл Губскі і Уладзіслаў Сулімскі.

Заслужаны артыст Расіі Міхаіл Губскі, запрошаны саліст маскоўскага Вялікага, артыст тэатра "Новая опера" імя А.У. Колабава, менавіта за гэтую партыю - Германа быў намінаваны на прэстыжную тэатральную расійскую прэмію "Залатая маска". Аб Губскім-Германе крытыкі пішуць: «Вобраз Германа - глыбокі і трагічны. Гэтая роля згуляная артыстам з поўнай самааддачай. Яго герой адначасова гнюсны, бездапаможны і ў той жа час – закаханы і спустошаны… Спявак ужо даўно набыў каханне публікі дзякуючы рэдкай сцэнічнай чароўнасці і высокаму прафесіяналізму. Праніклівасць і шчырасць выканання а, галоўнае, яго аксамітны «ап'яняльны» голас не можа пакінуць абыякавым ніводнага гледача ў зале…»

Губскі прымаў удзел у шматлікіх міжнародных праектах у ЗША, Канадзе, Францыі, Германіі, Аўстрыі, Італіі, Швейцарыі, Японіі, Фінляндыі, Славеніі, Польшчы, Расіі і на Кіпры. Ён працаваў разам з сусветна вядомымі дырыжорамі, такімі як: М.Растраповіч, М.Плятнёў, В.Співакоў, Я.Колабаў, Ф.Мансураў, А.Ведэрнікаў, М.Эрмлер, Ю.Кочнеў, В.Каваленка.

У рэпертуары Міхаіла Губскага больш за 60 партый, у тым ліку ў операх Дж. Вердзі (Альфрэд, "Травіята", Герцаг, "Рыгалета"), Г. Даніцэці (Немарына, "Любоўны напой", Гульельма, "Viva la Mamma!") , П. Чайкоўскага (Ленскі, «Яўген Анегін», Вакула, «Чаравічкі», Вадэмон, «Іаланта»), М. Рымскага-Корсакава (Моцарт, «Моцарт і Сальеры», Берандзей, «Снягурачка», Лыкаў, «Царская нявеста»), С. Рахманінава (Паола, «Франчэска да Рыміні», Малады цыган, «Алека»), Дж. Пучыні (Рудольф, «Багема»), С. Манюшка (Пан Дамазы, «Страшны двор») і многіх іншых.

***

Міхаіл Губскі ўжо выходзіў на мінскую сцэну ў вобразах Германа, Калафа і Радамеса. А вось Сулімскага-Томскага беларускі глядач пачуе ўпершыню. Хаця наша публіка ўжо заваявана салістам Марыінскага тэатра. Уладзіслаў удзельнічаў у канцэртных праграмах у Мінску (артыст браў удзел у сольным канцэрце Аксаны Волкавай і Гала-канцэрце Каляднага опернага форуму-2021). Зала Вялікага тэатра Беларусі апладзіравала яму, калі Сулімскі выходзіў у вобразах Рыгалета і Макбета ў операх Дж. Вердзі і дэбютаваў у партыі Валянціна ў «Фаўсце» Ш.Гуно. Цяпер - Томскі.

Барытон Уладзіслаў Сулімскі нарадзіўся ў Беларусі, горадзе Маладзечна. Пасля заканчэння Санкт-Пецярбургскай дзяржаўнай кансерваторыі імя Н.А. Рымскага-Корсакава ён стаў удзельнікам Акадэміі маладых оперных спевакоў Марыінскага тэатра, а ў 2004-м увайшоў у склад опернай трупы Марыінкі. Сулімскі праходзіў навучанне ў Мілане (у прафесара Р. Метры), удзельнічаў у майстар-класах Алены Абразцовай, Дзмітрыя Хварастоўскага, Уладзіміра Атлантава, Рэнаты Скота, Дэніса О'Ніла. Уладзіслаў - лаўрэат шматлікіх конкурсаў - у Рыме, Маскве, Санкт-Пецярбургу, Варшаве і інш. У 2016-м Сулімскі стаў уладальнікам вышэйшай тэатральнай прэміі Санкт-Пецярбурга «Залаты сафіт» у намінацыі «Лепшая мужчынская роля ў оперным спектаклі» (за ролю Сімона Баканегры ў пастаноўцы Марыінскага тэатра). А ў 2017-м - лаўрэатам яшчэ дзвюх оперных узнагарод - прэміі "Анегін" за ролю Манфора ў спектаклі "Сіцылійская вячэрня" (намінацыя "Майстар сцэны") і прэміі Casta Diva (намінацыя "Пявак года"). У 2021-м яму зноў уручылі прэмію «Анегін» – у намінацыі «Госць» за выкананне партыі Рэната ў оперы Дж. Вердзі «Баль-маскарад» у пастаноўцы Самарскага тэатра оперы і балета.

Як запрошаны саліст Уладзіслаў Сулімскі выступаў у Вялікім тэатры Расіі, тэатрах Базеля, Мальмё, Штутгарта, Рыгі, Даласа, на Эдынбургскім фестывалі, фестывалі ў Савонліне, фестывалі краін Балтыйскага мора, на Оперным фестывалі ў Санкт-Маргарэтэне (Аўстрыя). А на Глайндборнскім фестывалі ў Вялікабрытаніі Уладзіслаў Сулімскі выканаў партыю Мілера ў оперы Дж. Вердзі «Луіза Мілер».

Шмат хто кажа, што Чайкоўскі напісаў сваю «Пікавую даму», і яна — нашмат больш пераканаўча за пушкінскі арыгінал. Вырашыць, ці так гэта, вы, дарагія гледачы, зможаце 15 лютага.

У гэты вечар на сцэне Вялікага тэатра Беларусі галоўныя партыі таксама выканаюць: Марына Аксёнцова (Графіня), народная артыстка Беларусі Анастасія Масквіна (Ліза), заслужаныя артысты Рэспублікі Беларусь Аляксандр Кеда (Сурын), Алена Сало (Гувернантка), лаўрэаты міжнародных конкурсаў Аляксандр Краснадубскі (Ялецкі), Кацярына Міхнавец (Паліна), Віктар Мендзелеў (Чапліцкі), Янош Нелепа (Чакалінскі), Андрэй Мацюшонак (Распарадчык, 1-е выкананне), Дзіяна Трыфанава (Прылепа, 1-е выкананне), Дзмітрый Трафімук (Нарумаў), Алена Таболіч (Маша). За дырыжорскім пультам – уладальнік медаля Францыска Скарыны Іван Касцяхін.