«Папялушка» з Марый Эл

Дарагія сябры!

Звярніце ўвагу: замест харэаграфічнай фантазіі "Майстар і Маргарыта" 13 верасня Марыйскі дзяржаўны акадэмічны тэатр оперы і балета ім. Эрыка Сапаева пакажа ў Мінску балет С. Пракоф'ева "Папялушка". Яго прэм'ера адбылася ў 2008-м годзе - на VI фестывалі балета "У гонар Галіны Уланавай".

Усе набытыя білеты сапраўдныя або падлягаюць вяртанню ў касу тэатра!

Сюжэт гэтай гісторыі аб няшчаснай сіраце мае звыш тысячы ўвасабленняў у фальклоры розных народаў свету, але, мабыць, у рэдакцыі Шарля Перо казка стала адной з найлюбых.

«Папялушка» належыць да найбуйнейшых творчых поспехаў С.Пракоф'ева. Сам кампазітар пра свой новы балет пісаў: "Для мяне вельмі важна было, каб балет "Папялушка" атрымаўся найбольш танцавальным, каб танцы выцякалі з сюжэтнай канвы, былі разнастайныя і каб артысты балета мелі ў дастатковай меры магчымасць патанцаваць і паказаць сваё мастацтва".

Пастаноўку спектакля на сцэне Марыйскага тэатра ажыццявіў яго мастацкі кіраўнік - заслужаны артыст Расіі, народны артыст Рэспублікі Марый Эл Канстанцін Іваноў.