Архiў навiн

«Ілюзіі…» Колба

Літаральна праз некалькі месяцаў у Вялікім тэатры Беларусі яго галоўны балетмайстар - заслужаны артыст Расіі Ігар Колб прадставіць на суд гледачоў свой спектакль - балет "Ілюзіі Кахання". Майстэрні працуюць над пастаноўкай: ствараюцца дэкарацыі, шыюцца касцюмы, ідуць прымеркі і, вядома, рэпетыцыі.

Першая прэм'ера 91-га сезона ў Вялікім адбудзецца ў самым пачатку зімы. Над балетам "Ілюзіі Кахання" працуе каманда таленавітых і захопленых людзей, якую ўзначальвае галоўны балетмайстар тэатра Ігар Колб. Цікава, што ў мінулым, юбілейным для тэатра, годзе пастаноўка Ігара Паўлавіча - рамантычны балет А.Адана "Жызэль" таксама стала першай у чарадзе прэм'ер.

Мы бачым тое, што жадаем бачыць, і верым у тое, у што жадаем верыць. Але ці падманваем мы сябе? Ці ўсё ілюзорна? І ці магчыма вызначыць межы ўласнага ўспрымання, адчування, бачання?.. Як атрымаецца Ігару Колбу перадаць гэтыя эмоцыі на сцэне? «Шчыра: не ведаю, - кажа Ігар Паўлавіч. - Але спадзяюся, што атрымаецца. Да гэтай тэмы я звяртаўся неаднаразова, у тым ліку - у сваіх харэаграфічных нумарах. Няма людзей, якія б не жылі ілюзіямі, і нельга сказаць, што гэта мае выключна знак "мінус", ці выключна знак "плюс". Мы самі ствараем сваё жыццё, ілюзіі нам могуць дапамагчы, але могуць і пагоршыць сітуацыю... Што такое шчасце?.. Што такое каханне?.. След на вадзе, пылок на пальцах, адчуванне, якое немагчыма апісаць, эмацыянальны, які здаецца нерэальным струмень … Гэтая тэма сапраўды мучыць мяне. Спадзяюся, яна выплеснецца ў фармаце спектакля, у якім будзе як нотка суму, так і доля гумару…».

Каханне вачыма жанчыны - вось пра што будзе гэты балет на музыку Д. Шастаковіча і Ф. Шапэна.

«Спадзяюся, што гледачоў уразіць гарнітурная гісторыя: за прыгажосць адказваюць два мастакі – Вольга Мельнік-Малахава і Людміла Тараканава-Папкоўская. Мяне заўсёды прывабліваюць людзі з неардынарным поглядам на жыццё і нестандартным падыходам да сваёй працы. Хаця ў сваёй прафесіі яны проста купаюцца. І гэта сапраўднае шчасце - знайсці такую каманду, - працягвае Ігар Колб. - Гісторыя пачнецца летам, плаўна перацячэ ў восень і зіму і скончыцца вясной. Бо гэта надзея, без якой жыццё проста бессэнсоўнае. І сам па сабе я чалавек, для якога шклянка заўсёды напалову поўная, а не пустая…»
Першая дзея карціны будзе аддадзена музыцы Д. Шастаковіча, другая – аднаму з самых рамантычных кампазітараў – Ф. Шапэну.

«А наш сучаснік - Леанід Шырын дапаможа звязаць «Ілюзіі…» разам і скрозь прызму дня сённяшняга - зразумець, што такое каханне. У гэтым праекце аб'ядналіся тры "Ш", - усміхаецца Ігар Паўлавіч. – Адзначу, што Шастаковіч у балетных спектаклях яшчэ не гучаў у Вялікім тэатры, так што гэта будзе прэм'ера ў прэм'еры».

Дадамо, што над музычным матэрыялам спектакля працуе дырыжор Мікалай Калядка. А галоўныя партыі ў балеце рыхтуюць Людміла Хітрова, Лізавета Мусорына, Вікторыя Трэнкіна, Аліна Рудэнка, Канстанцін Белахвосцік, Уладзімір Руда, Дзмітрый Уксуснікаў, Марына Вежнавец, Вольга Гайко, Таццяна Уласень, Антон Краўчанка і іншыя.