Архiў навiн

«Новае дыханне»

21 лістапада дзякуючы таленавітым артыстам аркестра Вялікага тэатра Беларусі канцэрт у Камернай зале набудзе "Новае дыханне". Праграму пад такой назвай рыхтуюць у тандэме ансамбль трамбаністаў, а таксама калектыў «А.M.A.D.I.S. Brass»: Дзмітрый Гарбачук (труба), Аляксандр Антановіч (труба), Арцём Магілёўцаў (валторна), Андрэй Міхалевіч (трамбон), Віктар Ярыноўскі (туба) і Міхаіл Канстанцінаў (ударныя).

У гэты вечар прагучаць творы Г.Ф. Гендэля, Д.Шастаковіча, С. Пракоф'ева, А. Рубінштэйна, Г. Манчыні, А. Пьяццоллы, Дж.Уільямса і інш.
За раялем – заслужаная артыстка Рэспублікі Беларусь Юлія Шчарбакова.
Рэжысёр – Наталля Кузьмянкова.

Заўвага:

У гэтым годзе калектыў «A.M.A.D.I.S. Brass» адзначае дзесяцігоддзе з дня заснавання. Як кажа Дзмітрый Гарбачук, ідэя сабрацца малым складам духавых спела даволі доўга і выспела 10 гадоў таму, у 2013-м. Тады і з'явіўся «A.M.A.D.I.S. Brass». Усе яго ўдзельнікі – артысты аркестра Вялікага тэатра Беларусі. У назву ўвайшлі першыя літары іх імёнаў. Калі адбыліся некаторыя замены музыкаў, абрэвіятура ўжо настолькі замацавалася ў музычным свеце, што мяняць яе не сталі.

Сёння ў іх рэпертуары – каля паўсотні разнапланавых твораў. «Амадысы» запатрабаваныя – як запатрабаваная цудоўная душэўная музыка, якую яны нясуць гледачу. «A.M.A.D.I.S. Brass» – не столькі праца, колькі магчымасць больш поўна раскрываць сябе ў творчасці, падтрымліваць узровень майстэрства, нарошчваць патэнцыял», – кажа Дзмітрый Гарбачук.