Яраслаўна – Марыя Галкіна

– Гэта мая першая пастановачная праца ў Вялікім тэатры Беларусі, – кажа лаўрэат міжнародных конкурсаў Марыя Галкіна. У 2016-м спявачка скончыла Санкт-Пецярбургскую дзяржаўную кансерваторыю імя. Н.А. Рымскага-Корсакава. І ўжо ў 2018-м стала салісткай беларускага тэатра. – Гэта была сапраўды вялікая праца. Дзіўны рэжысёр Галіна Галкоўская дапамагла зразумець сутнасць оперы, дала прачуць усе вартасці, слабасці і недахопы персанажа, перажыць разам з гераіняй усе падзеі – і стварыць свой вобраз Яраслаўны. І за гэта Галіне Леанідаўне – вялікі дзякуй! Мне было неверагодна цікава працаваць, удзельнічаць у пастановачным працэсе. Як раз за 9 месяцаў – ад пачатку пастаноўкі да майго лютаўскага дэбюту – у нас нарадзілася мая Яраслаўна. Я закахалася ў гэтую ролю, бо гэта не просты персанаж: на працягу оперы пакорная, паслухмяная, кахаючая дзяўчына ператвараецца ў самага сапраўднага воіна. Калі гучыць набат: вораг ля сцен Пуціўля – яна становіцца абаронцам горада і народа, гатовая ўзяць у рукі зброю і абараняць свой род, сваіх людзей.

Руская музыка – гэта музыка душы. Таму не магу сказаць, што партыя Яраслаўны выклікала асаблівыя вакальныя цяжкасці. Складана размеркаваць эмоцыі на працягу спектакля, галоўнае не даць ім перашкодзіць спеву. Нельга дазволіць пачуццям ўзяць цябе ў палон на сцэне – перажываць павінны гледачы ў зале. Для мяне галоўны герой оперы Барадзіна менавіта Яраслаўна, таму што на ёй завязаная ўся драматычная частка. І ў фінале гэта зусім іншы чалавек, не той, што выходзіў на пачатку спектакля. Гэта спелая асоба, на якую я з часам хацела б пахадзіць. Адзінае пачуццё, што Яраслаўна пранесла праз усе гэтыя падзеі, – любоў да свайго Лады, князю Ігару. Любоў тут зусім іншая: духоўная каштоўнасць пераважае. Гэтую любоў душы хочацца данесці да кожнага гледача – перанесці з XІІ стагоддзя ў сучаснасць, у ХXІ стагоддзе.

Дадамо, што 11 лютага на сцэну Вялікага тэатра Беларусі ў пастаноўцы Галіны Галкоўскай, прэм'ера якой адкрывала 87-ы сезон, выйдуць: заслужаныя артысты рэспублікі Уладзімір Громаў (князь Ігар), Станіслаў Трыфанаў (Галіцкі), Андрэй Валенцій (Канчак), а таксама лаўрэаты міжнародных конкурсаў Крыскенція Стасенка (Канчакоўна), Аляксандр Міхнюк (Ігаравіч), Сяргей Лазарэвіч (Скула), Юрый Балацько (Ярошка), Святлана Марусевіч (Няня), Дзмітрый Капілаў (Гзак, дружына Галіцкага), Аляксандр Гелах, Аляксандр Жукаў, Андрэй Кліпо, Янаш Нялепа, Дзмітрый Трафімук, Дзяніс Янцэвіч, Андрэй Логвінаў, Павел Трафімік (дружына Галіцкага). За дырыжорскім пультам – маэстра Іван Касцяхін