Аксана Волкава. Чалавек года

6 лютага ўшаноўвалі пераможцаў конкурсу «Чалавек года ў сферы культуры». Мы ад усёй душы віншуем заслужаную артыстку Рэспублікі Беларусь, уладальніцу Дзяржаўнай прэміі Аксану Волкаву з перамогай у намінацыі «Тэатральнае мастацтва»! Яе голас даўно заваяваў гледачоў самых вядомых тэатраў свету: міланскага «Ла Скала», лонданскага «Ковант-Гардана», «Масіма» у Палерма, Оперы Ніцы, тэатра Сан-Карла ў Неапалі, аўстрыйскага Зальцбурга, Вялікага тэатра Расіі. Не першы сезон у вядучым тэатры свету - нью-ёркскім «Метраполітэн-опера» - гучыць мецца-сапрана беларускі Аксаны Волкавай. Яе дэбют на гэтай сцэне адбыўся ў 2013-м. А ў мінулым годзе яна адкрывала сезон у «Мэт» - спявала Джульету ў оперы Ж. Афенбаха «Казкі Гофмана». У пачатку 2018-га ўпершыню на беларускай сцэне яна паўстала ў ролі Сантуцы ў шэдэўры П. Масканьі «Сельскі гонар». У гэтым вобразе яна выйдзе перад гледачамі Вялікага тэатра Жэневы ў сакавіку.

Жадаем Аксане Волкавай поспехаў, натхнення, радасці творчасці!